Revista Galega de Administración Pública, EGAP
Núm. 67_xaneiro-xuño 2024 | pp. 169-170
Santiago de Compostela, 2024
https://doi.org/10.36402/regap.v67i1.5246
© Sophie Anton
ISSN-e: 1132-8371 | ISSN: 1132-8371
Recibido: 01/07/2024 | Aceptado: 03/12/2024
Editado baixo licenza Creative Commons Atribution 4.0 International License
Martín Fernández, Carmen, El régimen sancionador de la seguridad ciudadana, Thomson Reuters Aranzadi, Pamplona, 2023.
Sophie Antoun
Doutoranda en Dereito.
Universidade de Santiago de Compostela
O libro obxecto de recensión leva por título El régimen sancionador de la seguridad ciudadana. Trátase dunha obra da profesora Carmen Martín Fernández, quen é profesora de Dereito Administrativo na Universidade de Córdoba.
O estudo comeza cun prólogo do profesor Manuel Rebollo Puig, catedrático de Dereito Administrativo da Universidade de Córdoba, o cal fai unha perfecta introdución ao obxecto e pretensións da monografía.
A obra en si supón a publicación dun arduo traballo de investigación en que se perseguiu como obxectivo abordar ese réxime sancionador relativo á seguridade cidadá, réxime que se circunscribe á Lei orgánica 4/2015, do 30 de marzo, de protección da seguridade cidadá, que tivo, desde a súa aprobación, un especial interese xurídico.
Ao longo das súas páxinas atopámonos cunha estrutura perfectamente diferenciada do traballo, sendo esta unha parte xeral, constituída por cinco capítulos, e unha parte especial que consta de seis capítulos.
Na parte xeral abórdanse aspectos esenciais da seguridade cidadá. Concretamente trátanse, tal como se pode ver na nomenclatura dos capítulos, os límites que existen entre a rama do dereito penal e o administrativo sancionador no tema, o que se pretende protexer e quen posúe a competencia na materia, garantías xerais existentes, así como certos aspectos relacionados coa Lei orgánica 4/2015, do 30 de marzo, de protección da seguridade cidadá.
A parte especial céntrase en abordar as infraccións propiamente ditas en distintos temas que se circunscriben á lei orgánica.
A obra é un excelente estudo que a autora nos presenta en relación co réxime sancionador que se pode atopar na lei orgánica. Ao longo das súas páxinas, procede a facer unha análise completa e profunda do réxime, así como intentar achegar solucións e resolver incógnitas a problemas que se deron en relación co tema.
Atopámonos, en definitiva, cun traballo de importancia nunha materia tan relevante nos nosos días que se converte en bibliografía obrigada para quen desexe coñecer aspectos concernentes á seguridade cidadá.