Cursos

A Xustiza é unha área pública que afecta a ordes moi diversas da vida social, política e económica dun país. Un bo funcionamento do sistema de xustiza é un elemento clave para a existencia dunha democracia real na que se respecta o Estado de Dereito. Por iso, o curso pretende constituír un espazo de encontro no que se analicen e debatan as últimas reformas levadas a cabo no noso país no ámbito do Sector Xustiza, así como as anunciadas para un futuro inmediato.
Os temas que se propoñen destacan pola súa actualidade, ampla repercusión social e carácter polémico, resultando de interese tanto para un amplo abano de colectivos profesionais coma para a cidadanía en xeral.
Serán abordados dende unha perspectiva plural e multidisciplinar, por expertos que poñerán en común as súas ideas e experiencias, combinando as exposicións teórico-prácticas co comentario de casos e situacións reais, ao obxecto de poder extraer reflexións e conclusións sobre o estado actual da Xustiza española e as posibles vías de mellora ou solución.