Cursos

Por unha banda, no curso preténdense abordar as novidades normativas na materia de ordenación do territorio e urbanismo, como a recente entrada en vigor da Lei 1/2021, do 8 de xaneiro, de ordenación do territorio de Galicia, así como as últimas modificacións efectuadas sobre a Lei 2/2016, do 10 de febreiro, do Solo de Galicia.
Por outra banda, esta acción formativa ten por obxecto clarificar as relacións entre os diferentes suxeitos que operan na defensa da ordenación do territorio, do urbanismo e do litoral: fiscalía, xulgados e tribunais do poder xudicial, as diferentes Administracións territoriais e colexios profesionais que velan polo adecuado exercicio das profesións cualificadas para o proceso de urbanización e edificación.
Así, preténdese obter a visión de diferentes axentes que colaboran para o exercicio das súas respectivas potestades e competencias en defensa da legalidade territorial, urbanística e da ordenación do litoral en Galicia. Desta maneira, proxéctase a participación de representación da Fiscalía do Medio Ambiente, encargada de exercer a acusación pública fronte os delitos contra a ordenación do territorio; da Administración Xeral do Estado competente para a regulación xeral en materia de costas, así como para a vixilancia en defensa do dominio público marítimo-terrestre a través da Demarcación de Costas en Galicia; así como do Colexio Oficial de Arquitectos de Galicia, que vela polo correcto exercicio profesional dos encargados de atender á complexa e variada normativa sectorial con incidencia sobre o territorio e urbanismo.