Cursos

De acordo co establecido na base sexta, ordinal 6º, da convocatoria do Curso superior de técnico de urbanismo 2022/23 (DOG núm. 240, do 16 de decembro de 2021): No caso de dispoñer de prazas vacantes abrirase un prazo adicional de solicitudes só para os módulos optativos.

O módulo se focaliza na cidade existente e a complexidade e conflito que a caracteriza, co obxectivo de estimular nos técnicos participantes unha reflexión colectiva innovadora sobre a xestión urbana e o proxecto de cidade afastada do paradigma tecnocrático, burocrático ou metodolóxico característico do urbanismo formal.

Por esta razón o módulo arrinca na súa primeira xornada cunha evocación da vida cotiá das cidades que debe servir para contextualizar aspectos correntes da vida urbana, tan esquecidos na práctica diaria e como transcendentais na vida das persoas. Trátase, dalgunha forma, de comezar dando a voz e a palabra ás persoas e o seu drama vital cotián nas cidades.

Na segunda xornada preténdense mostrar outras visións posibles de cidade, de prácticas autónomas, de estratexias disruptivas e procuras activas de formas de vida urbana alternativas e críticas co discurso oficial.

Na terceira xornada poñeranse encima da mesa as experiencias e conflitos de quen fai xestión urbana desde a administración municipal.

Na cuarta e última xornada, empezaremos cunha sesión na que se incidirá na gobernanza do proxecto urbano, a custodia estratéxica da cidade e o combate cidadán da corrupción e a pobreza e que será preparatoria dun Laboratorio cidadán que pretende mostrar como focalizar e prototipar conclusións derivadas dos problemas detectados nas xornadas anteriores, co obxectivo de atopar respostas provisionais, tentativas, incompletas e mellorables.