A Lei 9/2017, do 8 de novembro, de contratos do sector público (LCSP) é unha norma que artella de forma moi extensa os distintos mecanismos, regras e procedementos aos que deben someterse os entes do sector público co fin de garantir que a contratación pública estea presidida polos principios fundamentais de concorrencia, publicidade, transparencia e igualdade entre licitadores.
A tramitación de expedientes de contratación en Galicia esixe, por tanto, partir do coñecemento xeral das distintas regras e conceptos regulados na LCSP, pero tamén o manexo doutros aspectos, como son as ferramentas electrónicas que a Xunta pon ao dispor tanto de xestores administrativos como de licitadores para participar no procedemento de contratación, ou ben, a implicación de cada trámite previsto na LCSP no parello expediente de gasto contractual.
Así, este curso busca ofrecer ao alumnado unha visión ampla e básica das regras e conceptos que a LCSP inclúe en cada unha das etapas nas que se estrutura o procedemento de adxudicación (preparación, adxudicación e execución) con reflexo das súas incidencias na Administración electrónica e na contabilidade. Deste xeito, o obxectivo último é o de xerar unha idea o máis global e integrada posible, con carácter eminentemente teórico pero proxección práctica, da tramitación de expedientes de contratación ao abeiro dos recursos e da normativa aplicable en Galicia.
T01 |