Xornadas

Os riscos naturais implican un perigo crecente para o normal desenvolvemento da sociedade. O cambio climático e as ondas estrañas constitúen dous exemplos destes riscos. Aínda así, estes riscos poden controlarse perfectamente dun xeito económico e que amais supoña ganancias de riqueza para a sociedade. Para conseguilo cómpre coñecer os riscos, as reaccións sociais cara a estes, e as novas teorías que enfrontan a economía desde unha postura de non-equilibrio.
A xornada estrutúrase en dous bloques: no primeiro describiranse os dous problemas mencionados, o cambio climático e as ondas estrañas, pola súa importancia, e porque representan dous bos exemplos de riscos naturais aos que o ser humano estivo exposto desde sempre, e que arestora están nun proceso de aceleración.
No segundo bloque analizaranse as reaccións sociais fronte ao risco e as respostas posibles tanto desde un punto de vista social como empresarial e económico. Insistirase sobre todo neste último aspecto porque na economía tradicional adóitase dicir que é demasiado «caro» atallar os riscos, verbi gratia, a adopción de medidas contra o cambio climático. Os resultados das novas teorías económicas, non lineais e afastadas do equilibrio indican que non só non é custoso combater os riscos, senón que é altamente beneficioso para a sociedade.