A terceira edición deste curso contará con 40 prazas ás que poderán acceder os enxeñeiros de camiños, canais e portos colexiados no Colexio de Enxeñeiros de Camiños, Canais e Portos; os alumnos da Escola Técnica Superior de Enxeñeiros de Camiños, Canais e Portos da Universidade da Coruña precolexiados ou os enxeñeiros civís pertencentes á Ordem dos Engenheiros de Portugal. O prazo de matrícula rematou o día 3 de febreiro.

Para facilitar o acceso a esta formación, o Colexio de Enxeñeiros de Camiños, Canais e Portos concederá unha bolsa para enxeñeiros en situación de desemprego laboral durante o 50% ou máis da duración do curso e para os alumnos da Universidade da Coruña.

O curso terá unha duración de 120 horas lectivas (100 teóricas e 20 prácticas) que se impartirán en horario de tarde os venres e en horario de mañá os sábados desde o 18 de febreiro ata o 11 de xuño.

Os principais obxectivos desta actividade formativa son complementar a formación dos enxeñeiros nas tarefas relacionadas coa Administración municipal, actualizar os conceptos urbanísticos de planificación e xestión, formar no diálogo con outras administracións e mellorar a súa competencia profesional. Para isto trataranse temas como as obrigas e competencias das entidades locais, as competencias dos enxeñeiros, os contratos do sector público, a prevención de riscos laborais, o uso de novas tecnoloxías, os plans urbanísticos e a lexislación sobre accesibilidade, entre outros.

Ademais, este curso valorarase con 1 punto a aqueles alumnos/as aprobados/as que cumpran os requisitos para a aplicación do establecido na Resolución do 26 de outubro de 1994, do Instituto Nacional de Administración Pública.

Para máis información consultar a resolución do Dog (24 de xaneiro de 2011).

Listado de admitidos no III Curso Superior de Formación de Enxeñeiros de Camiños, Canais e Portos na Administración Local