Sonia Rodriguez-Campos destacou na súa intervención a importancia que acadou dentro da Escola a modalidade de ensinanza online, que neste momento representa o 60% do total das prazas ofertadas, e resaltou os bos resultados acadados nas enquisas de satisfacción, resaltando a calidade como requisito básico da ensinanza, e á EGAP 2.0, que supuxo a apertura dos fondos documentais da Escola á sociedade e aos empregados públicos galegos a través da súa páxina web.
A directora tamén fixo fincapé no mantemento da oferta referida a idiomas estranxeiros, xa que durante este ano se convocaron un total de 55 cursos que serviron para dar formación a 1.960 persoas en lingua inglesa, francesa, portuguesa, alemá, árabe, chinesa e rusa. No referente ás ensinanzas sobre lingua galega, destacou a boa acollida por parte do alumnado dos cursos de linguaxe administrativa e xurídica da modalidade de teleformación e a súa extensión ao nivel superior.
Así mesmo, resaltou o ambicioso plan de formación relacionado coa certificación de competencias dixitais en Tecnoloxías da información e da comunicación (TIC), posto en marcha en colaboración coa Axencia para a Modernización Tecnolóxica de Galicia (Amtega). A través das actividades formativas do dito plan, contribúese a mellorar as competencias dixitais dentro da Administración, o que xa lle permitiu a máis de 200 empregados públicos obter a dita certificación.
O Consello Reitor da EGAP está integrado por expertos de recoñecido prestixio e con representantes das Universidades galegas, da Administración autonómica e local de Galicia e das organizacións sindicais.