O DOG do 31 de decembro publica o Plan de formación do 2013 para os empregados da Administración autonómica da Xunta de Galicia, elaborado pola Escola Galega de Administración Pública (EGAP). Este programa formativo dará lugar á convocatoria de 14.829 horas de formación, 15.282 prazas e 393 edicións de cursos.

Entre os puntos fortes deste programa formativo destacan as actividades relacionadas coas Tecnoloxías da Información e da Comunicación (TIC), as cales están encadradas na Axenda Dixital de Galicia 2014.gal e coa Certificación galega de competencias dixitais en ofimática. Por este motivo, no 2013 a Escola convocará tanto cursos coma probas libres para obter a dita certificación, sumando un total de 6.000 prazas.

Ao mesmo tempo, outro ano máis a lingua galega seguirá constituíndo un eixe fundamental no Plan formativo, consolidando os cursos de linguaxe administrativa galega. Por este motivo, a Escola convocará 33 edicións e 990 prazas nas modalidades online e presencial. Doutra banda, canto aos idiomas estranxeiros, impartiranse clases presenciais de inglés, e mediante teleformación de inglés, portugués e francés; sumando entre todas 34 edicións e 2.700 horas de formación.

O programa de autoformación:
Outro dos eixes estratéxicos para crear o Plan do 2013 foi o inicio dunha liña formativa baseada na autoformación, a cal permitirá facer chegar a un maior número de empregados públicos os materiais formativos dos que dispón a EGAP. Durante o próximo ano ofreceranse dentro deste programa cursos relacionados coa calidade na Administración pública, coa regulación normativa das subvencións, coa protección de datos, ou coa normativa relativa ás políticas de igualdade, entre outros.

Deste xeito, crearase unha nova modalidade que permitirá ao alumnado aprender de maneira autónoma a través de cursos que serán adaptados para permitir a autoaprendizaxe. A diferenza, con respecto das actividades formativas en teleformación, é que o proceso de aprendizaxe non estará guiado pola figura do titor. Cómpre destacar que os coñecementos que se adquiran poderán certificarse mediante a superación dunha proba presencial voluntaria.

O Plan de formación:
Este plan formativo xorde da aplicación dunha serie de liñas estratéxicas entre as que destaca a aposta, unha vez máis, pola modalidade de teleformación, xa que esta facilita o acceso á formación daqueles empregados públicos que, pola existencia de barreiras xeográficas ou por dificultades de conciliación da vida laboral e familiar, non poden optar á modalidade presencial; sen esquecer que este tipo de ensinanza permite ofrecer máis formación cun orzamento menor.
As distintas accións contidas neste plan contribuirán ao aumento da calidade dos servizos públicos que se prestan á cidadanía e incrementarán a capacitación profesional dos empregados das distintas Administracións públicas galegas, promovendo o seu desenvolvemento persoal e facilitando a súa mobilidade e promoción profesional.