Esta iniciativa ten como eixes vertebradores, por unha banda, a elevada cualificación profesional e intelectual dos relatores, e pola outra, o debate sobre cuestións estratéxicas para o futuro da Administración. Coa súa posta en marcha a Escola persegue propiciar foros de encontro e reflexión sobre aspectos con incidencia directa nas nosas administracións e no seu funcionamento. Ademais, preténdese fomentar o intercambio de ideas e experiencias que contribúan a innovar e a mellorar a xestión pública e a propia organización administrativa.

Durante o segundo trimestre do ano está previsto organizar o “Curso monográfico sobre retos e perspectivas do emprego público nun contexto de crise” (do 3 ao 5 de abril) e o “Curso monográfico sobre o futuro do Estado autonómico” (xuño).

Esta nova modalidade formativa, cunha duración que oscilará entre as 12 e as 15 horas, vai destinada aos empregados públicos das administracións galegas, aos profesionais dos sectores implicados en cada un dos cursos e aos interesados en xeral.

Os inscritos nos cursos terán dereito a recibir un diploma sempre que a súa asistencia sexa igual ou superior ao 90% das horas programadas. Nestes documentos faranse constar os contidos, a data e o lugar de realización da actividade.