Durante a súa intervención, Rodríguez-Campos destacou que no contexto de crise no que estamos inmersos o que procede é encarar a situación e propoñer diversas cuestións dentro do fundamento e da lexitimidade social da función pública, ás que darán resposta nun contexto pluridisciplinar expertos na materia que converterán a Escola nestes tres días nun foro de debate sobre o emprego público e a súa situación actual.

Seguindo estas directrices, o curso analiza a incidencia sobre a función pública das medidas que se están a adoptar en España como resposta á crise na que estamos inmersos, non só desde unha perspectiva estritamente económica ou de recorte do gasto público, senón tamén desde un punto de vista estrutural.

Nesta liña, algúns dos máis prestixiosos especialistas na materia tentarán suscitar o debate para albiscar a función pública que sairá desta crise e, polo tanto, para dar resposta a preguntas claves nas circunstancias actuais, tales como se hai demasiados funcionarios, se é lexítimo o recorte dos seus soldos ou se o seu rendemento é susceptible de control.

O curso conta con importantes relatores coma o maxistrado do Xulgado do Contencioso-Administrativo de Madrid, Alberto Palomar; a profesora de Dereito do Traballo e da Seguridade Social, María José Feijóo; o catedrático de Dereito do Traballo, Jesús Martínez; o catedrático de Dereito Constitucional, Roberto Blanco Valdés; e o maxistrado do Tribunal Constitucional, Luis Ortega, entre outros.

Esta actividade está dirixida ao persoal ao servizo das administracións galegas, profesionais universitarios e calquera persoa interesada en coñecer o réxime de función pública e os retos aos que se enfronta nas circunstancias actuais, e terá lugar na sede da Escola dende hoxe ata o vindeiro venres.