O convenio entre o CES e a EGAP permite a participación nas actividades da Escola ao persoal do Consello, así como a colaboración e o desenvolvemento conxunto de actividades de carácter formativo, divulgador ou investigador nos eidos de actuación e competencias das dúas institucións. Por este medio, trátase de actuar do xeito máis eficaz e eficiente na utilización dos recursos humanos, materiais e organizativos para o mellor cumprimento dos seus fins a prol da sociedade galega.

Entre outras actuacións, o acordo tamén contempla a participación do persoal do CES nas actividades da Escola, a edición conxunta de libros e outras publicacións e documentos de traballo e a promoción da actividade investigadora mediante proxectos conxuntos.