O enfoque baixo o cal se imparte é multidisciplinar, incluíndo materias que van desde a ciencia política, a ciencia da Administración, o Dereito público ou a economía ata a contabilidade, a socioloxía ou o marketing.

Este grao ten unha duración de catro anos (240 créditos ECTS) e unicamente se admiten 45 prazas no primeiro curso, destacando que boa parte da docencia ten lugar en grupos reducidos de 10 alumnos. Ademais, a Universidade dá a posibilidade de validar ata un 15% dos créditos por experiencia laboral e profesional, admitíndose tamén a matrícula parcial - cursando só as materias que lle interesen ao estudante e ofrecéndolle facilidades para a semipresencialidade-.

Este plan de estudos inclúe a posibilidade de realizar prácticas en institucións, empresas e organizacións públicas e de viaxar a distintas Universidades europeas e americanas a través de diversos programas de intercambio. (Máis información en http://csc.uvigo.es/index.php/direccion-e-xestion-publica ou en http://bit.ly/13efFMt.)

Así mesmo, no vindeiro curso terá lugar a terceira edición do primeiro Máster oficial da Universidade de Vigo totalmente online: o Máster en Dirección Pública e Liderado Institucional. Esta titulación, impartida por expertos de oito universidades públicas, pretende que os estudantes logren un alto nivel na función directiva no ámbito público, dirixíndose, principalmente, aos grupos A1 e A2 da Xunta de Galicia e das administracións locais galegas. A súa duración é dun ano (60 créditos ECTS) e soamente se admiten 20 prazas. Pode consultarse o programa completo e obter máis información en http://masterdireccionyliderazgo.com/.