Desde o pasado xoves ata o sábado a Escola Galega de Administración Pública acolleu nas súas instalacións o VI Congreso internacional e XI nacional de psicoloxía clínica que trouxo ata Santiago de Compostela a 1.000 profesionais procedentes de 24 países diferentes, entre os que se atopan expertos dos ámbitos sanitario, investigador e docente.

Este evento foi posible grazas á colaboración de 64 entidades, entre asociacións e sociedades científicas de psicoloxía. Nel presentáronse un total de 772 traballos científicos.

O congreso contou coa presenza de importantes persoeiros internacionais da psicoloxía como, Merry Bullock, a directora da Asociación Estadounidense de Psicoloxía, a máis importante do mundo; ou Geoffrey M. Reed, director da Clasificación dos trastornos mentais e do comportamento da Clasificación Internacional de Enfermidades da Organización Mundial da Saúde.

A Asociación Española de Psicología Conductual

A Asociación Española de Psicología Conductual (AEPC) organiza desde os anos 90 congresos nacionais e internacionais, cada ano nunha cidade diferente de España. A Escola Galega de Administración Pública acolleu este ano o primeiro destes eventos realizados en Galicia.

Cómpre lembrar que a AEPC é o referente da psicoloxía clínica en España, recoñecida polo Consello Xeral de Colexios Oficiais de Psicólogos.