O dito proceso levarase a cabo a través dun cuestionario online no que os empregados públicos responderán a cuestións relativas a temas, iniciativas ou accións concretas que respondan a necesidades formativas que observen na actualidade ou que prevexan para un futuro próximo e os destinatarios aos que deberían ofrecerse eses cursos.
Esta medida permitiralle á Escola coñecer as necesidades formativas do persoal ao servizo da Administración da Comunidade Autónoma de Galicia referidas tanto a coñecementos transversais coma específicos. A información que se obteña permitirá definir un plan de acción para lograr un maior axuste na determinación das prioridades formativas, contribuíndo a ofrecer programas de calidade e adecuados aos requirimentos dos usuarios.