A EGAP convértese nun foro de debate sobre transparencia e goberno aberto
Cursos / Xoves, 13 de Novembro de 2014.
A EGAP acolleu esta mañá o inicio dun curso monográfico sobre transparencia e goberno aberto organizado en conxunto entre este organismo e o Valedor do Pobo, no que se matricularon máis de 150 persoas. Na súa inauguración participaron Sonia Rodríguez-Campos, directora da EGAP; José Julio Fernández, valedor do Pobo; e José Luis Costa, presidente do Consello Consultivo de Galicia.
Durante este acto, a directora da Escola Galega de Administración Pública incidiu en que a transparencia, o acceso á información pública e as normas de bo goberno deben ser os eixes de toda acción política. “É fundamental que os cidadáns poidan coñecer baixo que criterios se toman as decisións que lles afectan e como”.
Nesta liña, “a implantación de medidas de transparencia debe servir para que calquera interesado poida coñecer o volume de gastos e ingresos das nosas administracións, con quen contratan os entes públicos, como e a quen se lle adxudican as subvencións ou canto lle custa ao departamento competente facer unha determinada obra”.
Ademais, Sonia Rodríguez-Campos quixo resaltar a boa situación da comunidade galega tanto por ter sido unha das pioneiras neste eido coa aprobación no 2006 da Lei de transparencia e boas prácticas na Administración pública galega, como por continuar traballando nesta liña na actualidade a través do proxecto de Lei de garantía da calidade dos servizos públicos e da boa administración, que establecerá sistemas de consulta aos cidadáns para coñecer as súas prioridades, percepcións e niveis de satisfacción coa prestación dos servizos públicos.
Finalmente, a directora da EGAP incidiu no feito de que “a transparencia constitúe o punto de partida ineludible para a reforma administrativa por simplificar a Administración para facela sostible, incrementar a eficacia no seu funcionamento e garantir a universalidade dos servizos públicos”.
Pola súa parte, o valedor do Pobo destacou a importancia de levar a cabo cursos de formación deste tipo, xa que “é necesario que exista un cambio metodolóxico á hora de xestionar os recursos públicos e eliminar as zonas opacas herdadas, que é o que piden ou demandan os nosos cidadáns”.