A Real Academia Galega dedícalle o Día das Letras Galegas de 2017 ao escritor e editor ourensán Carlos Casares (1941-2002). A EGAP, como institución pública galega, súmase á homenaxe deste galego insigne organizando un acto literario, así como unha viaxe de interese cultural.
No acto literario poderá participar calquera persoa interesada. Á viaxe cultural terá acceso só o persoal empregado público ao servizo de calquera das administracións públicas de Galicia (ata 50 prazas). No caso de presentárense máis solicitudes que prazas, terá preferencia o persoal ao servizo da Administración da Xunta de Galicia.
Acto literario
O día 12 de maio, ás 12.00 horas, no salón de actos da EGAP, celebrarase un acto literario no cal Xosé Carlos Caneiro e Emilio Rúa recitarán fragmentos da obra de Carlos Casares.
As persoas interesadas en participar no acto literario deberán inscribirse en
https://egap.xunta.gal/matricula/ entre o 6 de maio e as 23.00 horas do día 10 de maio de 2017.
Viaxe cultural
O día 13 de maio terá lugar unha viaxe de interese cultural polos escenarios onde transcorreu unha boa parte da vida do autor homenaxeado. O programa e o percorrido poderanse consultar na páxina web da EGAP.
Para inscribirse na viaxe cultural será preciso matricularse primeiro no acto literario. A continuación, as persoas interesadas en participar na viaxe cultural deberán, ademais, enviar un correo electrónico a novas.egap@xunta.gal, no cal se indiquen o seu nome, apelidos e datos de contacto, así como o seu vínculo de pertenza a calquera das administracións públicas de Galicia.
A inscrición na viaxe implica a obrigatoriedade de asistir ao acto literario. Para a selección da viaxe cultural terase en conta a data e a hora de recepción do correo electrónico.
Máis información no
DOG do 5 de maio e na
ficha do curso