No documento asinado esta mañá establécense as modalidades de colaboración previstas, que poderán consistir na programación de cursos, xornadas, seminarios e outras actividades de divulgación; na edición conxunta de libros, documentos de traballo e outras publicacións e na promoción da actividade investigadora de ambas as dúas institucións mediante proxectos de investigación.

A formación a través de convenio
A EGAP asinou durante 2017 un total de 49 convenios de colaboración con outras entidades, os cales deron lugar á realización dun total de 34 actividades formativas no que vai de ano.

Así, nos próximos meses están programados cursos sobre aplicacións informáticas, prevención de riscos laborais ou elaboración de pregos de cláusulas administrativas e prescricións técnicas, entre outros.

A sinatura de convenios permítelle á Escola Galega de Administración Pública xerar sinerxías con outros organismos, tanto públicos como privados, mellorando deste xeito a formación que pode ofrecer aos empregados públicos da Administración galega.