Esta nova publicación incluirá entre as súas páxinas varios estudos sobre temas tan actuais en torno ao sector público coma as medidas da Administración pública a favor da contratación das persoas con discapacidade, as medidas de fomento da transparencia na adxudicación de contratos no sector público, o novo réxime das notificacións administrativas ou a controvertida caracterización do contrato administrativo especial.

Ademais, o número 54 da Regap conterá artigos que abordarán a reconstrución da noción xurídica das empresas públicas peruanas, os fondos europeos de inversión e a transformación do emprego público en España a través da xurisprudencia europea.

Revista Galega de Administración Pública
A REGAP, que iniciou a súa andaina en 1992, estrutúrase ao xeito clásico das publicacións deste tipo con estudos doutrinais, xurisprudenciais e normativos. Na actualidade, dedícase a temas de actualidade co fin de analizar e achegar a contribución dos máximos e máis destacados especialistas en temas como o dereito autonómico, as novas tecnoloxías, os retos da Administración no século XXI, o estatuto dos empregados públicos ou a ordenación do territorio e o medio.