Esta mañá os membros do consello de redacción da Revista Galega de Administración Pública (Regap), publicación dirixida por Sonia Rodríguez-Campos, aprobaron a publicación dun número monográfico sobre a nova Lei de contratos do sector público.
O número 55 da Regap incluirá seis estudos sobre este recente texto legal que incidirán en aspectos coma as novidades en materia de contratación electrónica, os obxectivos da Lei, a análise das modificacións obxectivas no contrato de concesión, a disciplina da modificación do obxecto do contrato, o sistema administrativo de control interno e de supervisión e a contratación dos poderes adxudicadores distintos dunha administración.
Ademais, esta publicación contén tres notas sobre a Lei de contratos do sector público relativas á Administración local, ás perspectivas de cambio na lexislación do Brasil e ás dimensións sociais dos contratos públicos en Portugal.
Administración&Cidadanía
A EGAP tamén reuniu ao equipo de traballo da revista Administración&Cidadanía para aprobar o próximo número e planificar o seguinte. Así, o consello de redacción acordou incluír no Volume 13, número 1 artigos relativos á maternidade e a saúde laboral, á defensa colectiva dos consumidores, á relación entre as novas tecnoloxías e a integración da vida familiar ou ao solo industrial en Galicia; entre outros.
Ambas as publicacións son de libre acceso e descarga desde a
páxina web da Escola e estarán dispoñibles nas próximas semanas.