O obxecto deste acordo entre estes dous organismos é a participación nas actividades da Escola do persoal dependente da Deputación e das demais entidades locais da provincia de Ourense, así como a colaboración e o desenvolvemento conxunto de actividades de carácter formativo, divulgador e investigador en materias da competencia das institucións asinantes do mesmo.

A través desta iniciativa ambas as partes poñen de manifesto a vontade de actuar de forma máis eficaz e eficiente na utilización dos recursos das institucións que dirixen para un mellor cumprimento dos seus respectivos fins, en beneficio do persoal empregado público e da sociedade galega.

En virtude do disposto neste convenio, as modalidades de colaboración poderán consistir na participación nas actividades da EGAP do persoal dependente da Deputación e das demais entidades locais da provincia de Ourense; a realización conxunta de cursos, xornadas, seminarios ou outras actividades de divulgación; a edición conxunta de libros e outras publicacións; ou a promoción da actividade investigadora de ambas as institucións.