A EGAP reforza a formación en contratación pública
Cursos / Luns, 29 de Novembro de 2021.
Esta mañá tivo lugar na Escola Galega de Administración Pública (EGAP) un obradoiro xurídico-práctico sobre contratación pública dirixido exclusivamente aos empregados públicos de Galicia. Esta sesión formativa, á que asistiron máis de 100 persoas, foi impartido por Javier Vázquez Matilla, e tivo como obxectivo comprender e profundar sobre todas a fases do procedemento de contratación pública desde un punto de vista práctico e usando técnicas de dinámica de grupo coma a role play.
Durante a clausura desta actividade, a directora da EGAP, Sonia Rodríguez-Campos, agradeceu a participación dos asistentes e do relator e incidiu na importancia de ofrecer unha formación actualizada nesta materia, cunha metodoloxía moi práctica, xa que a profesionalización do persoal encargado neste campo é fundamental para a correcta aplicación da normativa.
Os asistentes puideron coñecer como redactar os documentos que compoñen o expediente de contratación, determinar as esixencias de solvencia de forma adecuada, alertar sobre as dificultades e principais incidencias da contratación e aprender cal é o contido mínimo dun documento de contrato, entre outros aspectos.
O obradoiro sobre contratación pública encádrase no proxecto Universo EGAP Innova co obxectivo principal de contribuir á autoxestión da aprendizaxe e a identificación de novas oportunidades, á innovación e ao cambio nas Administracións públicas.