Durante a súa intervención, a directora da Escola destacou a importancia da figura do procurador dentro do sistema xurídico, sinalándoo “como unha peza esencial no novo deseño do proceso, ao tratarse dun profesional con coñecementos técnicos sobre aquel, representando ás partes ante os Órganos xurisdicionais, co deber primordial de colaborar con estes na nobre función pública de administrar Xustiza”.

Este curso, que se desenvolveu entre o venres 15 e o sábado 16 de setembro, tivo como finalidade ofrecer aos docentes do Máster universitario en procuradoría unha visión completa e específica sobre os obxectivos, competencias e características deste programa de posgrao. O dito máster está organizado polas Universidades de Santiago de Compostela, A Coruña e Vigo en colaboración co Consello Galego dos Procuradores e cos Ilustres Colexios de Procuradores da Coruña, Lugo, Ourense, Pontevedra, Vigo e Santiago de Compostela.

Sinatura dun convenio de colaboración

Ademais, na mañá de hoxe a directora da EGAP e o presidente do Consello Galego dos Procuradores asinaron un convenio de colaboración para desenvolver actividades de formación, divulgación e investigación de xeito conxunto. Este último organismo ten como finalidade fomentar, crear e organizar institucións, servizos e actividades, con relación á profesión de procurador dos tribunais, que teñan por obxecto a formación e perfeccionamento profesional, a promoción cultural, a asistencia social e sanitaria, a previsión, a cooperación e o mutualismo, o fomento da ocupación e outras actuacións convenientes.