Sonia Rodríguez- Campos resaltou a importancia da actividade realizada por FEAFES Galicia, e a súa satisfacción porque a Escola colabore neste ámbito transcendental para a sociedade, e destacou que a primeira actuación a desenvolver conxuntamente, será a Xornada de Alternativas de Vivenda e Medidas Xurídicas de Protección para Persoas con Enfermidade Mental, que xa conta con douscentos participantes, e na que expertos analizarán a situación actual das opcións coas que contan os familiares no referente á vivenda e presentaranse experiencias novidosas levadas a cabo tanto a nivel nacional e internacional.

Ademais, as modalidades de colaboración previstas poderán consistir na realización conxunta de cursos, de xornadas, de seminarios e doutras actividades de divulgación; a edición conxunta de libros, doutras publicacións e de documentos de traballo; e a promoción da actividade investigadora de ambas as dúas institucións mediante proxectos de investigación conxuntos.

Feafes Galicia

A Federación de Asociacións de Familiares e Persoas con Enfermidade Mental de Galicia (Feafes Galicia) é unha entidade sen ánimo de lucro, creada en 1995 e que actualmente agrupa a 14 asociacións repartidas por toda a comunidade galega.

Feafes Galicia ten como obxectivo a mellora da calidade de vida das persoas con enfermidade mental e as súas familias e coidadores, a defensa dos seus dereitos e a representación e defensa do movemento asociativo, ofrecendo apoio e coordinación á asociacións que a integran. A través de asociacións e delegacións Feafes está presente nunha trintena de localidades galegas e representa ao colectivo de persoas con enfermidade mental da comunidade, das que máis de 39.000 teñen certificado de discapacidade.