A exposición é o primeiro dunha serie de actos que a Escola Galega de Administración Pública porá en marcha co gallo do Día das Letras Galegas 2013, que este ano está dedicado ao autor e actor teatral compostelán Roberto Vidal Bolaño.

Rueda destacou a traxectoria de Vidal Bolaño e a súa importancia para a profesionalización do teatro galego, aspectos que desenvolveu profundamente o profesor de Lingua galega e Literatura, Xosé Manuel Fernández Castro, nun relatorio sobre a traxectoria do homenaxeado.

Os actos continuarán o vindeiro 17 de maio, cunha proxección no Salón de Actos da EGAP do filme Doentes, de Gustavo Balza, baseado na obra homónima de Vidal Bolaño. A continuación, terá lugar un paseo por Compostela guiado polo profesor Fernández Castro, que partirá da praza do Obradoiro e seguirá o mesmo recorrido que fan os dous personaxes principais da obra, Cañete e Don Valeriano.