Xunta e Cogave imparten formación para directivos veciñais en seis cidades galegas
A Escola / Venres, 27 de Setembro de 2013.
A EGAP, en colaboración ca Confederación Galega de Asociacións Veciñais Rosalía de Castro (Cogave) vén de poñer en marcha varios cursos de formación para directivos veciñais en seis cidades galegas
A actividade está dirixida a uns 100 directivos, presidentes e secretarios de asociacións veciñais federadas de toda Galicia e impartirase nas localidades de A Coruña, Lugo, Ourense, Pontevedra, Vigo e Ferrol, co obxectivo fundamental de ofrecer aos asistentes unha formación que abranga os distintos aspectos que se teñen que ter en conta á hora de xestionar unha asociación de veciños. Por este motivo, o curso divídese en cinco bloques temáticos: informática, contabilidade, protocolo, o procedemento administrativo, e axudas e subvencións.
Esta actividade realízase en virtude dun convenio de colaboración asinado entre a Consellería de Presidencia, Administracións Públicas e Xustiza -a través da Dirección Xeral de Administración Local-, Cogave e a Escola Galega de Administración Pública.
A Confederación Galega de Asociacións Veciñais aglutina a Federacións Veciñais das catro provincias e representa a máis de 400 Asociacións Veciñais de toda Galicia.