No desenvolvemento deste acto a directora da EGAP destacou a implantación de novos modelos de resolución de conflitos, os cales evitan acudir a institucións que, pola súa estrutura, forma de actuar e dependencia, están suxeitas a unha normativa excesivamente ríxida. Ademais, lembrou que a mediación xa é unha realidade en Europa e que en España, aínda que algo tarde, a súa implantación se acelerou progresivamente ata converterse nunha alternativa que espertou grande entusiasmo.

Este encontro, ao que acudiron profesionais de toda Galicia, serviu para analizar e debater as reformas que o goberno central pretende levar a cabo para potenciar a vía da mediación a través dos colexios profesionais.