Este exemplar da Revista Galega de Administración Pública (Regap) inicia a serie de número monográficos desta publicación ofrecendo unha análise da ordenación autonómica do territorio e do urbanismo como factores esenciais na organización do territorio e da vida da poboación dunha comunidade.
Así, esta monografía pretende reflectir o estado da cuestión urbanística de Galicia achegando unha versión plural e poliédrica. Na dita publicación analízanse os instrumentos de ordenación do territorio, as políticas urbanas e territoriais, as infraestruturas e o seu papel na ordenación do territorio na Comunidade Autónoma, o papel do instituto expropiatorio na construción da identidade territorial galega, o solo típico e singular de Galicia (o solo de núcleo rural), a ordenación dos recursos naturais e mineiros, os novos procedementos de control da legalidade urbanística, os mecanismos de impugnación do planeamento, a disciplina urbanística, a normativa de vivenda de 2011 da Comunidade Autónoma de Galicia, as paisaxes culturais e o novo marco regulatorio do urbanismo, entre outras cuestións.
A edición desta monografía é o resultado do esforzo da EGAP por manter a súa misión de investigación e de realización de traballos de divulgación no campo da Administración pública, tal e como lle foi asignado a esta institución nos seus fins fundacionais. Neste ámbito encádrase a elaboración de revistas de índole científica, das que a Regap constitúe a publicación emblemática, de referencia no ámbito administrativo galego.
Este e outros números da Regap pódense descargar de xeito gratuíto a través de
http://egap.xunta.gal/publicacions/publicacionsPorCategoria/12