Un total de 45 alumnos, pertencentes á Administración autonómica e local, iniciaron hoxe unha actividade que os vai dotar dos instrumentos e ferramentas de análise e de xestión necesarios para despregar ao máximo as súas potencialidades de liderado, implantar a cultura da calidade e a mellora continua no eido público, e optimizar a satisfacción da cidadanía cos servizos públicos.

Para conseguilo a EGAP incluíu nesta edición certas modificacións que lle permitirán optimizar o axuste entre a actividade formativa e as demandas dos traballadores públicos destinatarios, perseguindo unha maior participación do alumnado e un enfoque máis práctico dos contidos. Así, para o curso de directivos do ano 2014 a Escola programou unha docencia integramente presencial na que se inclúe un traballo final en equipo, reduciu o número de prazas para ofrecer unha docencia máis personalizada e estruturou os contidos ao redor de cinco módulos sobre temas esenciais para este perfil profesional como a análise estratéxica, a toma de decisións, a xestión pública, a comunicación e o desenvolvemento de competencias de dirección.

O curso para a obtención do diploma de directivo é un eixe fundamental para impulsar a modernización e a reforma da Administración, o cal significa optimizar a eficacia e a eficiencia da súa actividade xestora e prestacional. Por este motivo, a dita actividade convértese nunha formación imprescindible para adquirir as competencias e habilidades necesarias para o exercicio apto e responsable de funcións directivas.