Este acto foi presidido pola directora da EGAP, Sonia Rodríguez-Campos, a cal fixo referencia á importancia do Día das Letras Galegas ao servir como homenaxe daquelas persoas que destacaron pola súa creación literaria na lingua galega ou pola súa defensa; poñendo de manifesto a importancia que en Galicia lle damos ao noso idioma como signo de identificación para todos os galegos e como elemento literario de referencia.

Ademais, Rodríguez-Campos resaltou a importancia da obra de Díaz Castro referíndose explicitamente ao seu poemario Nimbos, que tivo unha grande influenza en moitos escritores de xeneracións posteriores, e ao seu poema “Penélope”, un berro para vencer a apatía coa que moitas veces se cualifica aos galegos.

Finalmente, o profesor Armando Requeixo Cuba, un dos principais investigadores e coñecedores do autor homenaxeado, ofreceu aos asistentes un relatorio sobre a vida de Díaz Castro a través dos lugares e persoas que influíron na súa obra.

Xeira cultural

A celebración do Día das Letras Galegas continuará na Escola Galega de Administración Pública o próximo sábado coa realización dunha visita aos lugares máis representativos da vida e obra de Díaz Castro, que será guiada por Felipe-Senén López, historiador de arte e arqueólogo. Durante esa xornada os asistentes coñecerán o Lugo romano e as novas iniciativas museísticas, a Terra Chá de Díaz Castro e os montes de Friol.