Esta tarde a sede do Colexio Oficial de Arquitectos de Galicia (COAG), en Santiago de Compostela, acolleu a inauguración do “Curso sobre o novo marco normativo do urbanismo en Galicia: a Lei 2/2016 do solo de Galicia e o seu regulamento e regulamento de actividades” á que asistiron a directora xeral de Ordenación do Territorio e Urbanismo, Encarnación Rivas, e a directora da EGAP, Sonia Rodríguez-Campos.

Durante o acto de apertura do curso, Sonia Rodríguez-Campos incidiu no firme obxectivo da EGAP de colaborar con outras entidades para contribuír á análise daquelas materias que precisan dun estudo máis especializado e que teñen un impacto social importante, como é o caso desta actividade conxunta co COAG.

Neste sentido, lembrou que a recente aprobación de normativas que afectan ao eido urbanístico, xunto cos cambios económicos, sociais e ambientais, fan indispensable programar unha formación especializada neste eido que permita aos profesionais enfrontarse aos actuais desafíos na evolución das realidades urbanas e territoriais das nosas vilas.

Esta actividade permitirá formar durante os próximos dous meses a 40 persoas nas novidades da Lei 2/2016 do solo de Galicia, o seu regulamento e o regulamento de actividades económicas e apertura de establecementos. O curso desenvolverase de xeito simultáneo en cinco localidades galegas.