A EGAP presenta un ano máis un plan de formación que contén accións formativas de carácter transversal, que teñen por obxecto ofrecer un currículo básico horizontal orientado a capacitar o alumnado para o desenvolvemento das funcións que son xenéricas, e específico, cuxo obxectivo está directamente relacionado coa adaptación permanente ao posto de traballo, incluíndo contidos sectoriais relativos a competencias concretas.

O plan volve apostar este ano polas diferentes contornas de aprendizaxe e metodoloxías, mediante a distribución da oferta formativa nas modalidades de autoformación, teleformación e docencia presencial..

Ademais dos contidos, o Plan formativo para o ano 2018 presenta importantes novidades no que respecta á súa configuración e deseño. Entre elas, por primeira vez efectuarase unha oferta formativa conxunta para o persoal ao servizo da Administración pública da Comunidade Autónoma de Galicia, das entidades públicas instrumentais e da Administración institucional.

Por primeira vez tamén todos os colectivos poderán acceder á formación enmarcada no portal de idiomas, no plan ofimático e no programa de autoformación, que constitúen tres dos alicerces vertebradores do Plan formativo da EGAP. Deste xeito, garántese que todas as persoas destinatarias do Plan formativo, con independencia da administración á que pertenzan, poidan acceder a esta formación de carácter transversal, que é precisamente a que concentra a maior demanda.

Outra novidade importante para este ano, coa que se da resposta a unha reiterada demanda do alumnado, é a descentralización das probas de avaliación das actividades enmarcadas no plan ofimático e no programa de autoformación. Con este cambio, a EGAP quere facilitar ao conxunto do persoal ao servizo das administracións públicas de Galicia o acceso á formación.

Cómpre lembrar que esta resolución ten carácter informativo e que a matrícula ás actividades queda ligada á publicación das diferentes convocatorias no DOG.

Para máis información, pulsar aquí.