A actualización do dito regulamento ten como finalidade modificar certos procedementos relativos ao seu funcionamento que lle permitan participar no proceso de avaliación proposto pola Fundación Española para la Ciencia y la Tecnología (FECYT). Ademais, a través destas modificacións, a revista logrará unha maior profesionalización e internacionalización, á vez que un maior recoñecemento da súa excelencia editorial e científica.

Este dobre obxectivo permitirá incrementar o índice de impacto de Administración&Cidadanía, mellorar a súa posición con respecto a outras publicacións e conseguir unha maior apertura cara ao exterior.

O próximo número
O próximo número da revista incluirá varios artigos nos que sinalados expertos analizan en profundidade o fenómeno da globalización. A presentación do próximo volume foi redactada polo catedrático de Economía Aplicada da Universidade de Vigo, Xosé Carlos Arias Moreira.

A continuación, seis artigos tratan a globalización con artigos sobre a criminalidade organizada, a gobernanza nas actividades marítimas, a economía, o branqueo de diñeiro ou o populismo.

Finalmente, o profesor da USC Miguel Anxo Bastos Boubeta reseña o libro “Conectografía. Mapear el futuro de la civilización mundial”.

Todos estes artigos estarán dispoñibles na páxina web da EGAP para a súa libre descarga nas próximas semanas.