Durante o acto de entrega, Sonia Rodríguez-Campos destacou a importancia deste premio pola súa contribución á promoción e ao impulso de estudos multidisciplinares sobre a Administración pública. Ademais, resaltou que a vertente investigadora da Escola, reflectida tanto a través deste premio coma das publicacións, serve como punto de partida a outros profesionais e investigadores para coñecer con maior profundidade o sector público dende as súas diversas vertentes científicas. Sen dúbida, o fomento do esforzo investigador, así como a realización de estudos sobre o eido público na nosa Comunidade son iniciativas que redundarán nunha mellora do seu funcionamento.

Por outra banda, a directora da EGAP tamén quixo lembrar a figura de Manuel Colmeiro, destacado xurista galego responsable de importantes achegas tanto ao Dereito administrativo moderno, como ao Dereito político e á economía.

Rodrigo Pousa Diéguez, o autor premiado, realizou unha investigación sobre a Galicia do Antigo Réxime nun estudo titulado “La administración local en tres señoríos del Antiguo Régimen: Corcubión, Muros y Noia”, analizando polo miúdo unha época na que a comunidade galega contaba cun mapa administrativo moi fragmentado e complexo, con sete provincias divididas en incontables xurisdicións, concellos e partidos.

Este rigoroso traballo académico –premiado pola súa calidade científica e metodolóxica- presenta desde unha óptica multidisciplinar as particularidades máis destacables das vilas de Muros, Noia e Corcubión durante o citado período histórico. O estudo pon en relevo aquelas características comúns a todos estes territorios –emanadas do seu carácter urbano, marítimo-portuario, señorial e galaico- así como as diferencias existentes entre elas, facendo fincapé na pluralidade do fenómeno municipal do noroeste peninsular.