A REGAP abordará no próximo número diversos aspectos relacionados coa covid-19
Publicacións / Luns, 14 de Decembro de 2020.
Esta tarde reuníronse na EGAP os membros do consello de redacción da Revista Galega de Administración Pública (Regap), publicación dirixida por Sonia Rodríguez-Campos, para aprobar os contidos do número 60 (xullo-decembro 2020).
Esta nova publicación incluirá entre as súas páxinas dous estudos sobre a covid-19 que abordarán a pandemia dende ámbitos diferentes. Así, o próximo número da Regap publicará os artigos titulados “Dereito a unha información sanitaria precisa e a unha boa xestión dos datos epidemiolóxicos. Un número pendente en España debido á Covid-19”, de Francisco Javier Sanz Larruga -catedrático de Dereito administrativo da UDC- e “Pandemia, axudas de Estado e axudas aos estados”, de Juan Antonio Rodríguez Míguez -subdirector xeral de investigación da Comisión Galega da Competencia-.
Ademais, o próximo número da revista incluirá textos sobre as causas xerais de resolución dos contratos administrativos, a recuperación de servizos públicos locais, a planificación do territorio en áreas de baixa densidade, a mediación no proceso contencioso-administrativo, os contornos de protección dos bens culturais, a integridade na contratación pública ou o principio de autoridade nos procedementos con administracións públicas.
Todos estes artigos estarán dispoñibles nas próximas semanas na páxina web da Escola e o seu acceso e descarga será libre.