O próximo número desta publicación incluirá varios artigos relacionados coas consecuencias da pandemia en diversos eidos. Así, no ámbito económico publicaranse os textos de Ricardo Rivero Ortega, catedrático de Dereito Administrativo da Universidade de Salamanca, sobre o papel das entidades locais na reactivación da economía; e de Serafín Pazos Vidal, doutor en Ciencias Políticas, sobre o Plan “España puede” e a gobernanza territorial.

Por outra banda, Lorenzo Cotino Hueso, catedrático de Dereito Constitucional da Universitat de Valencia, analizará os toques de queda, confinamentos territoriais e prohibicións de actividades e horarios na contención da covid-19; María Luisa Gómez Jiménez, profesora titular de Dereito Administrativo da Universidade de Málaga, examinará o novo paradigma regulatorio no exercicio das competencias das administracións locais durante o estado de alarma; e Antonio Garrido Rubia, profesor titular de Ciencia Política da Universidade de Murcia, ofrecerá unha perspectiva comparada da comunicación política e da comunicación de crises sanitarias en España.

Finalmente, a publicación tamén incluirá un artigo de Fernando González Laxe, catedrático de Economía Aplicada da Universidade da Coruña, sobre os contrastes e a competitividade da organización económica de Galicia; e unha reseña do libro de Agustín García Inda ‘El Estado David. Suprimir, sustituir, simplificar. Salida de emergencia del Estado de Bienestar’.