A celebración estivo centrada en lembrar as tres décadas e media de vida dun organismo que hoxe é un referente da formación continua dos empregados públicos, segundo afirmou Miguel Corgos, quen na súa intervención recordou aos seis directores da Escola e agradeceu a súa implicación de acadar o obxectivo de impartir cada vez máis formación a diferentes colectivos públicos, cunha maior especialización e incorporando as novas tecnoloxías para prestar un servizo fundamental á función pública galega.

O responsable da Facenda e a Administración Pública autonómicas fixo especial fincapé no crecemento das actividades formativas impartidas, pasando de 33 no ano 1987 a 787 35 anos despois, en paralelo ao iincremento do orzamento da EGAP, que supera na actualidade os 4 millóns de euros.

Miguel Corgos rematou instando aos asistentes a non conformarse con todo o acadado ao longo destes 35 anos, senón a continuar traballando na profesionalización da función pública galega, a través do fomento da aprendizaxe continua e da innovación.

A directora da EGAP, Sonia Rodríguez-Campos destacou o traballo realizado polo organismo durante estes anos con actuacións destinadas a acadar un sector público máis eficiente e eficaz a través da formación e a investigación co gallo de consolidar unha Administración de calidade cun persoal capacitado para ofrecer o mellor servizo á cidadanía galega. Neste tempo, incidiu, superáronse retos transcendentais como a incorporación das novas tecnoloxías ao contorno laboral e á docencia, a integración de todos os colectivos de empregados públicos á formación continua, a promoción e posta en valor da lingua galega, ou o fomento da investigación no eido público.

Recompilación de lexislación autonómica
Durante o acto conmemorativo presentouse a obra “Lexislación autonómica. Galicia 1981-”, unha publicación elaborada coa finalidade de ofrecer unha visión de conxunto do marco normativo de rango legal vixente na Comunidade Autónoma de Galicia e subministrar á vez elementos que faciliten a comprensión do sentido e alcance deses textos normativos así como a súa adecuada aplicación por parte dos operadores xurídicos e da cidadanía en xeral.

Logo de transcorridos máis de corenta anos desde a aprobación do Estatuto de Autonomía de Galicia, esta recompilación recolle a versión vixente das principais leis e normas con rango de lei autonómicas ditadas ao abeiro das competencias da Comunidade Autónoma galega asumidas estatutariamente. A obra será actualizada periodicamente para incluír as novidades normativas.