A Escola Galega de Administración Pública, en colaboración coa Axencia para a Modernización Tecnolóxica de Galicia, convoca un curso superior en ciberseguridade dirixido a afondar no coñecemento desta materia, tanto desde unha perspectiva técnico-xurídica como desde unha perspectiva práctica.
Obxectivos do curso:
-
Concienciar o alumnado sobre a relevancia da ciberseguridade desde todos os ámbitos, desde a perspectiva normativa á técnica e, así mesmo, dotalo das boas prácticas precisas para previr e detectar contratempos no emprego de sistemas das tecnoloxías da información e da comunicación (TIC).
-
Dar a coñecer os aspectos relacionados coas políticas de seguridade na utilización dos medios electrónicos, que se recollen no Esquema nacional de seguridade (ENS).
-
Proporcionar ao alumnado unha visión global da seguridade dos sistemas de información, das súas vulnerabilidades, das ameazas a que están sometidos e dos riscos que comporta o seu uso.
Persoas destinatarias: o persoal empregado público da Administración xeral da Comunidade Autónoma de Galicia, das súas entidades públicas instrumentais e da Administración institucional; da Administración local e das universidades do Sistema universitario de Galicia, sempre que teña perfil en tecnoloxías da información e das comunicacións (pertencente a escalas de sistemas e tecnoloxías da información ou que realice funcións TIC) e que poida xustificar debidamente que as súas funcións están relacionadas coa materia impartida e que se encadren nas seguintes categorías:
-
Grupo A (subgrupos A1 e A2) do persoal funcionario.
-
Grupos I e II do persoal laboral.
Duración: 99 horas lectivas (3 horas presenciais, 30 horas de telepresenza, 65 horas de teleformación e 1 hora de exame final en liña)
Datas: o curso desenvolverase desde o 25 de abril de 2023 ata o 21 de xuño de 2023:
-
A xornada inaugural presencial terá lugar o 25 de abril de 2023, en horario de tarde.
-
As clases de telepresenza desenvolveranse en horario de tarde os días: 26 de abril; 3, 8, 10, 16, 22, 24 e 31 de maio; e 7 e 14 de xuño de 2023.
-
O exame final en liña será o día 21 de xuño de 2023, en horario de tarde.
Inscrición: desde as 9 horas do 17 de abril ata as 23.59 horas do 19 de abril na área de matrícula da EGAP.