Publicado o Plan de formación para o ano 2024
Cursos / Mércores, 10 de Xaneiro de 2024.
O DOG do 10 de xaneiro recolle o Plan de formación para o ano 2024 do persoal ao servizo da Administración xeral da Comunidade Autónoma de Galicia, das entidades públicas instrumentais e da Administración institucional, do persoal ao servizo das entidades locais, do persoal ao servizo da Administración de xustiza de Galicia, do persoal de administración e servizos das universidades galegas, así como as actividades enmarcadas no portal de idiomas, o Plan de formación igualdade e prevención e loita contra a violencia de xénero, as actividades de formación en competencias dixitais (ComDix), o programa de formación do Instituto de Economía Pública de Galicia e o programa de autoformación, dirixido a todos os destinatarios mencionados.
O plan aprobado para o ano 2024 inclúe como principais novidades:
-
A convocatoria das sete actividades do nivel iniciación da Certificación galega en competencias dixitais (ComDix). Os títulos pertencentes á antiga Certificación galega de competencias dixitais en ofimática pasan a integrarse na área de formación transversal.
-
A implementación do nivel medio de formación en igualdade e prevención e loita contra a violencia de xénero, co curso “A integración da perspectiva de xénero na práctica administrativa: nivel medio” (150 horas). A formación en igualdade complétase con novos contidos sobre violencia de xénero na muller maior, homofobia ou explotación sexual.
-
Programación de novidades formativas relevantes, tanto desde desde o punto de vista dos contidos coma da proxección práctica, na área de réxime xurídico.
-
A ampliación da oferta en idiomas con dous novos cursos de nivel superior de lingua inglesa.
-
O deseño dun programa formativo, completo e específico, sobre novas tecnoloxías con cursos sobre intelixencia artificial, administración electrónica, robotización aplicada á xestión pública ou ciberseguridade.
-
A actualización de máis do 50% dos contidos na área de formación específica, dirixida ao persoal ao servizo da Administración xeral da Comunidade Autónoma de Galicia, das entidades públicas instrumentais do sector público autonómico e da Administración institucional.
-
A programación de novos títulos en materia de economía pública que se convocarán ao abeiro do IEP.
-
Convocatoria de formación dirixida a procurar o benestar laboral, con cursos sobre coidado da saúde ou relacións saudables.
Cómpre sinalar que para matricularse nas accións formativas recollidas neste plan será preciso esperar á publicación no Diario Oficial de Galicia das correspondentes convocatorias.