A directora da EGAP, Sonia Rodríguez-Campos, presentou a sesión impartida polo catedrático de Dereito Administrativo da UNED, Jesús Ángel Fuentetaja Pastor, e nel participaron un cento de empregados públicos a través da modalidade de telepresenza.

No webinario analizouse o réxime xurídico do persoal funcionario interino a partir, por unha banda, da xurisprudencia do Tribunal de Xustiza da Unión Europea e, por outra, da súa recepción polos tribunais españois.

O obxecto de estudo desta actividade formativa foi dobre: primeiro, a prohibición de discriminación entre o persoal funcionario de carreira e o persoal funcionario interino, especificando os elementos do réxime xurídico dese persoal que foron recoñecidos a este pola xurisprudencia, pero tamén polo lexislador e a Administración.

O segundo obxecto do webinario organizado pola EGAP foi analizar as medidas preventivas e reactivas ante as relacións funcionariais interinas, prestando particular atención á visión dos tribunais, tanto sobre os procesos de estabilización como da reivindicación da conversión da relación interina en fixa.