A directora da Egap, Sonia Rodríguez-Campos, salientou que con esta actividade formativa búscase a reciclaxe pero tamén a análise crítica da normativa para que os empregados públicos no ámbito financeiro e tributario poidan facer o seu traballo nas mellores condicións posibles.

Durante a súa intervención, afirmou que co curso monográfico perséguese a promoción dun enfoque eminentemente práctico, na procura de acadar a máxima aplicabilidade dos coñecementos e habilidades que se adquiren coa formación e, polo tanto, o maior impacto posible no desempeño laboral do persoal ao servizo das administracións públicas. Trátase dun foro con vocación de permanencia para coñecer, fundamentar e harmonizar criterios nas cuestións máis controvertidas en materia tributaria autonómica.

Entre os relatores que participaron na xornada do venres destacou a presenza do vicepresidente do Tribunal Supremo, Dimitry Teodoro Berberoff Ayuda, que ofreceu a conferencia de clausura As novidades xurisprudenciais sobre aspectos procedimentais tributarios, en especial, a execución de resolucións e sentenzas.

Tamén interviron o maxistrado do Tribunal Supremo, Isaac Merino Jara; a xefa da área de xestión tributaria da Atriga, Fernanda Amigo Barcia; o catedrático de Dereito Financeiro e Tributario da Universidade de Vigo, Roberto Ignacio Fernández López, e o secretario da Xunta Arbitral de Conflitos, Juan Luis Sanchís Moll.

Durante dous días destacados expertos a nivel xurídico, financeiro e tributario de Galicia e de fora da Comunidade galega analizaron diversos aspectos controvertidos relacionados coa aplicación dos tributos xestionados pola Axencia Tributaria de Galicia mediante unha revisión desde un punto de visto normativo, doutrinal, académico e xurisprudencial.

Este curso cunha duración de 12 horas, que puido facerse de maneira presencial e por telepresenza, tivo unha clara orientación dinámica e práctica que permitiu o intercambio de información e coñecementos entre todos os axentes implicados na aplicación do sistema tributario.

A tributación dos excesos de adxudicación, o tratamento das reduccións do imposto de sucesión en negocios mortis causa sucesivos, a determiniación da base impoñible na tranmisión inter vivos de bens inmobles e as novidades xurisprudenciais sobre aspectos procedimentais tributarios foron algúns dos temas analizados neste curso monográfico.