Xornadas

A experiencia xurídica romana e o dereito público moderno. Evolución dos conceptos de Estado e de Dereito Público.

Resumo dos principios do sistema tributario romano que comeza cunha ampla introducción na que se relacionan as palabras de Cicerón coa actualidade. Prosigue relatando a clasicidade do léxico fiscal e tributario romano atendendo á linguaxe propia deste ámbito. Continúa cunha exposición dos instrumentos de política financeira e dos fundamentos da imposición fiscal.

Finaliza cunha enumeración dos principios informadores do sistema tributario: proporcionalidade e capacidade económica; igualdade e xeneralidade; benignidade, humanidade e equidade; legalidade; indispoñibilidade; obxectividade e seguridade xurídica; razoabilidade e utilidade común; e preclusividade.

A terra é un elemento básico e relevante para entender o dereito romano, que provocou un gran número de confrontacións durante as diferentes reformas agrarias. O problema da distribución do territorio aparece cando os pobos deixan de ser nómades e xorde a propiedade privada.

Tamén se fai referencia ás posibles orixes de Roma e ao modo en que se inicia a distribución das terras, dando lugar á creación dunha organización política. Finalmente alúdese ao concepto de mancipi e as súas relacións co Estado.

Disertación sobre os fundamentos nos que se basea a democracia moderna.

Breve análise das implicacións realizadas polos irmáns Graco na época clásica. Nun primeiro momento alúdese ao momento histórico que se vivía en Roma e aos conflitos sociais presentes na época, entre os que destacaban a reforma agraria e as diferencias entre os patricios e os plebeos polo status de cidadán. Os irmáns Graco intentaron cambiar unha situación na que a terra do estado, ou terra pública, estaba xestionada polos cabaleiros pero era traballada polos escravos.

Propuxeron unha redistribución das terra, tendo en conta os problemas que isto implicou. Repásanse os motivos do fracaso da reforma a pesar de que os irmáns Graco souberon ver, de maneira acertada, a necesidade dunha reforma agraria. Inclúense continuas referencias a Arxentina, non só no que ten que ver coa redistribución das terras, senón tamén no referido ás empresas.

Análise da organización territorial de Galicia durante a época romana, durante a cal existiu unha concepción moi clara dos límites e do espazo.

Faise un repaso das principais cidades e lugares clave que pertencían a Galicia, coméntase o modo de conquista polos romanos e as diferenzas existentes coa conquista do resto de España. Durante a época clásica a creación de provincias respondía a unha necesidade de conectar todo o Imperio Romano. Diocleciano, consciente desta peculiaridade, creou varias dioceses que á súa vez se subdividían en provincias.

Análise da profesión da avogacía e da súa relación coa administración pública e coa defensa dos dereitos dos cidadáns. A Administración pública, tal e como está configurada na actualidade, é o resultado dun longo proceso de desenvolvemento que comeza na época clásica e que reflicte a transformación da sociedade. A función pública ten como misión crear un espazo de convivencia da cidadanía, convertendo o funcionario nun servidor da institución. Dentro deste marco, a avogacía presta un servizo público, ao interactuar coa administración orientándoa aos valores da convivencia civil e logrando unha sociedade pacífica.

Análise do marco teórico do status civis tendo en conta as formas de relación do suxeito coa comunidade, a cidadanía como autodeterminación persoal, a dialéctica da soberanía das leis e dos homes, a cidadanía moderna e a cidadanía cosmopolita, a evolución liberal e as xeracións de Dereitos humanos e a cidadanía constitucional e europea.

Mostra das similitudes entre a carreira administrativa actual e a carreira administrativa na antiga Roma. En ámbolos dous casos preséntase a posibilidade de ascender nun posto a través dunha estrutura xerárquica e conseguir un grao de responsabilidade maior.

Explícanse o papel desenvolvido polos maxistrados romanos facendo fincapé nas características de gratuidade, temporalidade e colexialidade. Ademais, clasifícanse as diferentes maxistraturas existentes e analízanse os poderes que posuía cada unha.