Novas

A directora da Escola Galega de Administración Pública (EGAP), Sonia Rodríguez-Campos, e a secretaria territorial da Xunta en Ourense, Mª Sol Díaz Mouteira, inauguraron hoxe a xornada A Lei 10/2014 de accesibilidade de Galicia e a convención internacional sobre persoas con discapacidade 2006: aplicación e control polas administracións públicas, que se foi seguida por un total de 163 persoas, en Ourense de xeito presencial e mediante videoconferencia en Santiago de Compostela, A Coruña, Lugo, Pontevedra e Vigo. Ao acto inaugural tamén asistiu o profesor de Dereito administrativo da Universidade de Vigo e director da xornada, Jacinto Lareo Jiménez.

De acordo co convenio de colaboración subscrito entre a Escola Galega de Administración Pública e o Instituto Galego de Seguridade e Saúde Laboral convócase un curso de prevención de riscos laborais destinado aos empregados públicos, traballadores por conta allea ou autónomos, empresarios e aquelas persoas con inquietudes neste ámbito.

O vicepresidente da Xunta de Galicia, Alfonso Rueda, asistiu ao Consello Reitor da Escola Galega de Administración Pública, no que a directora do organismo, Sonia Rodríguez-Campos, informou sobre as actividades do 2016 e o programa previsto para este ano. O Plan de formación de 2017 presentado hoxe contempla un forte incremento das materias relativas á administración electrónica e inclúe un total de 623 actividades dirixidas ao persoal das administracións públicas da Comunidade Autónoma de Galicia, o que suporá un 18% máis ca no ano anterior.

Esta tarde a Escola Galega de Administración Pública acolleu a apertura do ano académico da Academia de Ciencias Veterinarias de Galicia, ao que asistíu a directora da EGAP, Sonia Rodríguez-Campos. Durante o acto a Academia presentou a memoria anual do ano 2016 e Arturo Anadón Navarro, presidente da Real Academia de Ciencias Veterinarias de España, impartiu unha conferencia maxistral.