Novas

A directora da Escola Galega de Administración Pública, Sonia Rodríguez-Campos incidiu hoxe na inauguración do curso sobre as novidades do emprego público na importancia e oportunidade desta actividade formativa, na que se analizarán e debaterán os cambios producidos no réxime do persoal ao servizo das Administracións como consecuencia da crise e, máis en particular, as consecuencias derivadas da aplicación do Estatuto Básico do Empregado Público.

Transcorridos case oito anos desde a entrada en vigor do Estatuto básico do empregado público, a EGAP convoca un curso para analizar a problemática xurdida a raíz da súa implantación, así como do seu desenvolvemento e aplicación ao longo destes anos, facendo fincapé naquelas cuestións que, pola súa complexidade ou polas dúbidas na súa interpretación, merecen ser obxecto de debate e reflexión ao longo do curso, no cal participarán relatores de recoñecido prestixio, que coas súas explicacións nos permitirán ter unha idea máis clara da situación actual.

A Escola Galega de Administración Pública reuniu a máis de 200 asistentes nunha xornada na que numerosos expertos analizaron as posibilidades da mediación nas relacións entre a cidadanía e as administracións públicas. O obxectivo principal deste encontro é espertar o interese por unha forma diferente de resolver os conflitos, alternativa e complementaria á vía xudicial. Así, a mediación enténdese como un instrumento áxil e eficaz a través de instancias non xudiciais e neutrais que propoñan entre as partes un acordo voluntario coa finalidade de rematar co conflito e evitar o litixio xudicial.

A Escola Galega de Administración Pública convoca a xornada As posibilidades de mediación nas relacións entre os cidadáns e as administracións públicas co obxectivo de espertar nos asistentes o interese por unha forma diferente de resolución dos conflitos entre os cidadáns e as administracións, alternativa á promoción de recursos administrativos e/ou xurisdicionais.

A directora da Escola Galega de Administración Pública, Sonia Rodríguez-Campos; o secretario xeral para o Deporte, José Ramón Lete; e o director xeral de Xuventude e Voluntariado, Ovidio Rodeiro, inauguraron esta tarde en Santiago de Compostela unha xornada sobre a natureza voluntaria e laboral das actividades desenvolvidas nas entidades deportivas sen ánimo de lucro.