Novas

De acordo co convenio de colaboración entre a Escola Galega de Administración Pública e Cualtis, S.L.U. para o desenvolvemento de actividades de formación, divulgación e investigación convócase un curso dirixido ao persoal dos equipos de alarma e evacuación, de primeira intervención e de primeiros auxilios, así como ao persoal que desempeñe a xefatura de emerxencia e/ou primeira intervención do Edificio Administrativo da Xunta de Galicia en Lugo, sito na rolda da Muralla, 70. 

Consonte os obxectivos do Instituto de Economía Pública de Galicia, recollidos no protocolo de colaboración polo que se establecen os principios reitores e de funcionamento do devandito instituto, e aprobado o programa de actividades formativas da Escola Galega de Administración Pública para o ano 2022 polo Consello Reitor, convócanse novas actividades de formación continua en materia de economía pública.

A Escola Galega de Administración Pública convoca, dentro do programa de actividades do Instituto de Economía Pública de Galicia, un curso superior que ten por obxecto adquirir ou, de ser o caso, actualizar os coñecementos do alumnado no Plan xeral de contabilidade, analizando as novidades máis relevantes da última reforma contable en vigor desde o 1 de xaneiro de 2021 e que afecta a normativa sobre instrumentos financeiros e recoñecemento de ingresos.

A Escola Galega de Administración Pública, en colaboración coa Axencia para a Modernización Tecnolóxica de Galicia, convoca o curso superior en ciberseguridade para afondar no coñecemento desta materia, tanto desde unha perspectiva técnico-xurídica como desde unha perspectiva práctica.

Un total de corenta empregados públicos das administracións galegas participan desde hoxe e ata o vindeiro 12 de maio no curso monográfico Introdución á fiscalidade internacional, organizado pola Escola Galega de Administración Pública (EGAP) ao abeiro do Instituto de Economía Pública de Galicia.