Novas

Durante o ano 2015 a Escola Galega de Administración Pública consolidou o seu compromiso coa formación e a divulgación a través da convocatoria de 596 actividades e 27.763 prazas, o que supón superar as cifras do ano anterior nun 8,7 por cento no número de actividades e nun 9,5 por cento no número de prazas.

A EGAP acolleu hoxe a xornada formativa “Elixibilidade, simplificación e avaliación dos fondos estruturais e de investimento europeos 2014-2020”, organizada por este organismo en colaboración coa Dirección Xeral de Relacións Exteriores e a Unión Europea. Esta actividade formativa de marcado carácter práctico estivo dirixida a facilitar aos xestores públicos dos fondos europeos as claves necesarias para xestionar e executar de xeito estratéxico as inversións comunitarias previstas para o período 2014-2020.

A EGAP acolleu hoxe a inauguración do curso monográfico A posta en marcha da transparencia activa e pasiva, que terá lugar durante dous días na sede deste organismo e no que se analizará a aplicación da Lei estatal 19/2013 do 9 de decembro, sobre transparencia, acceso á información e bo goberno, que é de obrigado cumprimento en tódalas comunidades autónomas e entidades locais a partir de hoxe. Este curso, no que participan preto de 200 persoas, pretende ademais darlles a coñecer aos asistentes as disposicións de transparencia activa e pasiva que recolle a lexislación estatal, a que obriga ás administracións, que dereitos teñen os cidadáns e os procedementos de actuación.

A directora da Escola Galega de Administración Pública (EGAP), Sonia Rodríguez-Campos, e a secretaria territorial da Xunta en Vigo, Yolanda Lesmes Romero, inauguraron hoxe a xornada A Lei 10/2014 de accesibilidade de Galicia e a convención internacional sobre persoas con discapacidade 2006: aplicación e control polas administracións públicas, que se celebrou en Vigo e na que participaron preto de 100 persoas. Ao acto inaugural tamén asistiu o profesor de Dereito administrativo da Universidade de Vigo e director da xornada, Jacinto Lareo Jiménez.