Novas

A Escola Galega de Administración Pública convoca, no marco da iniciativa Universo EGAP Innova e en colaboración coa Axencia para a Modernización Tecnolóxica de Galicia, a xornada de formación práctica dixital (E-martes) sobre sistemas para a contratación pública.

A Comunidade Autónoma de Galicia vén experimentando nas últimas décadas un importante proceso de transformación demográfica, socioeconómica e cultural. Os trazos máis salientables da súa dinámica demográfica, compartidos co resto de España, Europa e os países desenvolvidos, son, por unha parte, o incremento da esperanza de vida e, por outra, a variación da fecundidade, que en Galicia, como en todas as sociedades avanzadas, diminuíu nos últimos sesenta anos, malia que aquí dun xeito máis rápido e marcado.

Consonte os obxectivos do Instituto de Economía Pública de Galicia, recollidos no protocolo de colaboración polo que se establecen os principios reitores e de funcionamento do devandito instituto, e aprobado o programa de actividades formativas da Escola Galega de Administración Pública para o ano 2022 polo Consello Reitor, convócanse actividades de formación continua en materia de economía pública.

O Plan formativo en materia de igualdade e violencia de xénero para o ano 2022 continúa cunha oferta formativa conxunta para que todos os colectivos poidan acceder á formación con independencia da Administración á que pertenzan. Estas actuacións teñen o propósito de que o maior número de persoas ao servizo das administracións públicas poida acceder a unha formación específica sobre estes contidos, e contribuír así, a través da capacitación do persoal, a integrar a igualdade de oportunidades de xeito transversal nas actuacións das administracións públicas de Galicia.

As actividades formativas en materia de violencia de xénero están a ser financiadas nun 46% con fondos do Pacto de Estado contra a Violencia de Xénero (Ministerio da Presidencia, Relacións coas Cortes e Igualdade). 

A Escola Galega de Administración Pública e o Instituto Galego de Seguridade e Saúde Laboral convocan cursos en teleformación de prevención de riscos laborais de nivel básico para persoal empregado público, traballador por conta allea ou autónomo, empresario e persoa con inquietudes no ámbito da prevención de riscos laborais.